借題發揮：足球快綫腳法靚

猪拉多纳

　　上季姚廐有啲質新馬，初出雷聲大雨點小，賠率對晒辦，熱一熱，但跑落可以一步都冇，輸到嗌都冇得嗌。「風聲」大可能係主因，但如係純粹靠「吹」，斷唔會熱得太犀利。

　　「足球快綫」就係上述呢類馬，去季初出跑田草1000米，捧到得廿幾蚊獨贏，跑落只得殿軍，仲要係輸成6個身位咁遠，根本係冇任何水準可言，最慘仲係跑完呢場之後，跟住無以為繼，再跑直路賽，跟兩段就力弱，轉到1200米，更加冇乜追勁或前跟力。

　　呢匹馬跑落唔對路，係外界太過熱情，才令初出熱起上嚟？定係進度影響？亦有機會係健康出了問題，只因初出之前一度缺課（另在第2仗賽後曾發出呼吸聲）。不過，睇外形真係俊俏，腳法又靚，一旦納回正軌，四班兩W，邊會有問題。

Jack