洪禮賢講馬：希望幻滅屢見不鮮

猪拉多纳

　　晨課動態重要，但又未必係真實嘅全部。練馬師成擔心機擺晒落去，唔係大晒，亦唔一定會有成績交出，智者千慮必有一失，已經講到好「白」嘞。

　　隻馬有質素，操練妥妥當當，進程喺預計之內，加埋倉主朝早睇到實，係咪代表實得？

　　一個唔好彩，隻馬首次亮相，怯場令情緒波動，出現焦慮、周身大汗，而陣上又有意外，慢閘、失蹄、畀對手攔腰撞，咁多可能性，如果是但拖中幾瓣，莫講係初出馬，富有經驗而實力雄厚嘅，一樣企喺度，輸到母雷公咁遠都仲得！

　　又譬如，練馬師未夠5點「棟」咗喺烽火台，但凡佢啲馬出跳，均會全神吼實，而對啲質新或具來頭嘅馬，更會企起身、舉晒鏡咁追住睇，跟住加多個指定動作（機坪接埋馬），冇死啦，呢鋪實搏命！點知買落去，由出閘一刻便希望幻滅，閘前反應唔快，直路又冇份衝。

　　呢類個案，可以話屢見不鮮，尤其係陷入低潮嘅馬房，練馬師晨課一定唔會「平靜」，但嗰啲馬出賽成績又點？「撇」嘅多， 上名嘅少囉。