洪禮賢講馬：晨操熱辣辣

猪拉多纳

　　開場白要講題外話，日前有位uncle指出，筆者早前拙作中一段，可能未必啱。事緣歷年來最高連贏派彩未必係「聖利」搭「春風得意」呢條萬八蚊Q，有可能係N年前（唔知係戰後，定職業化之前），「新圖」搭「大將」（希望馬名冇錯），當年呢條Q金額大到場內電算機顯示唔到，要人手寫出嚟！究竟嗰條Q派多少，我真係搵唔到，如有讀者知道，不妨交流吓，唔該。

　　噚日朝早去睇晨操，用兩個字形容晒……爛和熱！爛嘅所指，唔係啲馬出到嚟甩皮甩骨，而係場內看台裝修中，好多地區重鋪過地磚，周圍掘到爛晒，好似要整多間玻璃房喺看台，真係沙塵滾滾。但相信工程之後，馬場會再變靚啲。

　　由於6點幾鐘陽光直射埋嚟，喺看台嘅我，個望遠鏡亦好㷫，小弟曝曬一輪，已汗流浹背。之後行去機坪，途中撞見揸緊單車嘅輝哥，佢仲問我有冇汗出㗎（其實我抹緊汗），當時好想講：「輝哥，不如載一程，唔想行呀。」寫到呢度，真係佩服及致敬，喺馬場操馬嘅人士，咁熱都頂得順！

馬會賽馬節目主持　洪禮賢