傾掂數3.1億賣拿斯尼

猪拉多纳

24/08/2011


大戰當前，阿仙奴再賣走主將，已同意將法國中場拿斯尼出售畀曼城，據悉轉會費為2,400萬鎊（約3.1億港元）。拿斯尼已前往曼城接受體測，如果一切順利，雙方將會正式簽約。


過埋體測簽約曼城


根據規例，球員唔可以喺同一屆歐聯代表唔同球隊比賽，曼城趕及喺阿仙奴作客烏甸尼斯前同兵工廠達成協議，總算得物有所用。事實上，拿斯尼明年約滿，阿仙奴強行留住佢，最終只會人財兩失，出售佢亦屬合理決定，之前拖延只想賣個好價錢。




阿仙奴賣拿斯尼雖然可以賺番筆，但如果因而出局，隨時得不償失，除咗會令兵工廠自九八年以來，首次無緣踢歐聯分組賽，亦會令球會最少損失約2,500萬鎊（約3.2億港元）收入。