巴塞擺大佬款 伊比利亞內訌 歐超盃恰波圖

猪拉多纳

26/08/2011
文： 巨高

今晚上演歐洲超級盃決戰，上屆歐聯冠軍巴塞隆拿在中立場摩納哥火併歐霸盃冠軍波圖。巴塞經過西班牙超級盃兩回合大戰皇家馬德里後，球員狀態明顯操起，上場在「甘伯盃」大炒拿玻里係最佳證明，而呢三場賽事都開出大盤，巨高認為值得追捧。（有線61及201台周六凌晨2時45分直播）




今場比賽除名譽攸關外，雙方仲要肩負起振奮人心重責，現今歐洲經濟不景氣，唔少國家包括西班牙及葡萄牙都出現債務危機，國家前景不明朗，失業率及通脹令國民情緒低落，負能量瀰漫整個歐陸。喺呢個艱難時刻，一場精彩嘅足球比賽就成為最有效興奮劑，藉着兩支歐洲賽冠軍得主，於極具歷史價值嘅摩納哥路易二世球場為球迷獻出無限激情，希望所有人都可以重新抬起頭，昂然跨過重重難關。




波圖及巴塞隆拿各擁大量球迷支持，球員每一個細微動作都足以牽動人心，屬伊比利亞半島內最具感染力球隊，由佢哋去激勵人心就最好不過。正當歐洲面臨史無前例經濟危機時，呢場歐洲超級盃可謂來得合時。




查實歐洲人生活比以前艱苦得多，「歐豬國家」包括西班牙及葡萄牙，經濟更每況愈下，唔少金融界人士終日頭耷耷眼濕濕，以一副極差精神面貌迎接每一天，呢種負面情緒對於改善國家經濟可謂毫無幫助，為唔想令情況繼續惡化，巴塞及波圖將攜手合作，於場上展露積極進取及拚搏一面。


鬥攻搶1800萬獎金


值得一提，歐洲超級盃獎金相當可觀，冠軍球隊可獲約1,800萬港元，以單一場次計算都幾和味。依家歐洲經濟不景氣，球會收入難免會受到影響，商業球會當然要把握每一個賺錢機會幫補吓。




究竟西班牙勁定係葡萄牙醒，今時今日已經唔再重要，能夠喺伊比利亞球迷面前踢出一場精彩絕倫比賽，令到人們積極面對經濟危機，至係今場主旨。要精彩的話，入球絕對係重要素材，料今場入球數字唔會少，大盤係巨高心水選擇。