巴塞食住個勢o趙波圖

猪拉多纳

26/08/2011
文： 朱楓

一年一度嘅歐洲超級盃今晚喺摩納哥路易二世球場爆發！應屆歐聯盟主巴塞隆拿強戰歐霸盃冠軍波圖。巴塞人腳係「地上最強」，依家仲要有埋法比加斯同阿歷斯山齊士，簡直「升呢」去到全宇宙至勁，對住面目全非嘅波圖，相信可以極速捧新季第二冠，朱楓撐硬1.95倍「讓球主勝」！（有線61、201及中央5台周六凌晨2:45直播）




自從哥迪奧拿接掌球隊後，巴塞近年橫掃歐洲球壇。雖然皇馬今夏大事擴軍，但早前喺西超盃兩回合都搞唔掂狀態未去到十足嘅巴塞，只要呢支「宇宙最強」撻着，睇怕都仲有排威！




其實巴塞本身人腳已經好勁，美斯、韋拿、沙維、恩尼斯達個個都獨當一面，今季再買埋阿歷斯山齊士同法比加斯兩大球星，當中尤以重返母會嘅法比仔最轟動，早前對拿玻里首次為巴塞正選上陣，改打影子前鋒閃電開齋，適應能力勁到咁，今晚隨時又嚟料。


贏完皇馬再炒拿玻里


雖然巴塞賽前證實中堅碧基左腳肌肉撕裂，同佩奧爾一樣至少要抖三個禮拜，慶幸仲有馬斯真蘭奴同布斯基斯兩大通天老倌頂上，影響根本唔大。至於話近排西甲罷工會唔會影響巴塞狀態？相信大家睇完巴塞喺甘柏盃大炒意甲季軍拿玻里5:0後，都應該有答案啦！


波圖星散有心無力


波圖上季成為四冠王，本應有力一拚，可惜鋒芒太露，結果季前被歐洲列強肢解，教練保亞斯、上屆歐霸盃射手法卡奧、中場魯賓米卡爾三大主力先後被挖走，有傳左閘艾華路佩雷拉亦已獲車路士睇中，今戰唔會披甲，中堅路蘭度亦將轉會巴黎聖日耳門，士氣唔慌好得去邊。最慘係新簽嘅比利時國腳迪科同法國守將文加拿上陣成疑，啱啱踢完世青盃嘅中場占士洛迪古斯同伊度比又啱啱先復操，對住「宇宙最強」巴塞，你唔係覺得有得鍊啩？