紅軍上力炒得起保頓

猪拉多纳

27/08/2011
文： 張志德

周日凌晨英超利物浦主場對保頓，細鬼睇好紅軍。利物浦季初表現理想，射手蘇亞雷斯場場有波入，細鬼相信佢同安祖卡路爾呢個進攻組合，今季會喺英超大放異彩，捧「讓球主勝」。（有線300台周日凌晨零時30分直播）




利物浦今季都算幾順，係開鑼戰主場畀新特蘭逼和令人稍為失望，最近兩場已撥亂反正，先後擊敗阿仙奴同埃克塞特，三場波表現最搶鏡嘅係蘇亞雷斯，呢位入球機器嘅射門觸覺相當強，由上季加盟利物浦開始，到美洲國家盃都好sharp，細鬼相當欣賞佢，加上有安祖卡路爾呢架坦克車幫佢開路，紅軍今季嘅進攻好立體。


無緣歐戰反而得益


事實上，紅軍今季最大優勢就係唔使踢歐洲賽，可專心應付聯賽，而佢哋周中聯賽盃亦收起咗部分球員，等啲主力可以回一回氣，而幾名新兵好似達寧、佐敦軒達臣、查理阿當及荷西安歷基感覺上都幾啱用，領隊杜格利殊買人都算對症下藥，細鬼對紅軍今季都抱幾大期望。




保頓開鑼戰係威係勢，以四比○大破昆士柏流浪，但上輪對實力較強嘅曼城已現形，保頓季初缺少咗養傷嘅李青龍，而上季合共入十八球嘅艾文達同史杜列治都離隊，對整體實力有影響，細鬼覺得保頓實力只算中游，對住弱隊或可偷雞，但對利物浦呢類級數嘅球隊，都好難爆冷成功！




本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。