菲臘斯孭飛 黑池大鬧水晶宮

猪拉多纳

27/08/2011
文： 亨格比利

家有一老如有一寶，試問季前有邊個估到菲臘斯成38歲人都一樣咁堅吖！今季加盟黑池嘅菲臘斯，開咧至今已經攞到4球「士哥」，今晚造訪防線穿大窿嘅水晶宮，睇怕又係佢老哥嘅Show Time，一於敲2.35倍客W。（now638台周六晚10:00直播）




新季跌番落英冠嘅黑池，去季喺英超憑開放式踢法贏盡口碑，雖然最終降班收場，不過領隊荷路維就一於少理，繼續大打進攻足球，估唔到呢家波咁啱菲臘斯發揮，開季4戰攻入4球，上仗仲靠佢梅開二度逼和白禮頓，終止對方嘅連勝走勢，都咪話唔堅。


水晶宮4將打柴


據英國傳媒透露，荷路維仲未夠喉，計劃羅致多兩位攻擊球員，目標之一就係修咸頓鋒將賓捷安，消息話成事機會好高，新季仲未交到貨嘅比利奇勒為保正選，今晚仲唔加多兩錢肉緊做番齣好戲咩！




主隊水晶宮聯賽3連勝，冇錯睇落係好弗，但除咗右閘尼達利基尼養緊傷之外，防中迪加蓋爾同奧雲加雲都打咗柴，射手格連梅利足踝受傷亦未必踢得，攻守兩瓣都有隱憂，主場輸埋有乜咁奇呀？