鬧爆英足總粗口Sir

猪拉多纳

28/08/2011


老費爆粗插英足總！曼聯或有八人入選英格蘭大軍，主帥費格遜回應時突然大發雷霆，指「紅魔鬼」係全球為國家隊貢獻最多球會，英格蘭足總仲恩將仇報針對佢哋，佢老人家仲講到爆晒粗，真係惡死！


英軍大戶好惡死


曼聯童子軍開季表現出色，盛傳韋碧克、湯卡華利及菲爾鍾斯等小將有望入選英軍，連同朗尼及艾舒利楊格等人，隨時有八個球員被徵召，老費回應時非常火滾：「或者有一日英足總會知我哋為國家隊供應幾多球員，到時佢哋會知曼聯有幾重要，而唔係當我哋係S×××！」




費Sir一直對曼聯上季多次被罰感到不滿，今次無喇喇發難爆粗，令唔少英國傳媒大感意外。不過，費爵爺亦盛讚一眾即將入選英軍嘅小將：「我真係非常滿意佢哋嘅表現，呢班球員真係好出色。」