洪禮賢講馬:破格例子令人回味

猪拉多纳

　　馬季三部曲，季初以進度先行，季中講求質素，去到季尾體力為主。上述講嘅只係概況，唔係一成不變。

　　馬匹質素叻唔叻？有時跑落至知，族大有乞兒，血統背景顯赫又如何，老豆本事，未必虎父無犬子，記得當年愛倫有匹「丹山」子嗣，喺拍賣會以高價投得，結果跑極唔識贏馬之餘，好似仲冇乜上過名，當日「丹山」夠行啩！佢個仔一樣唔掂，故此，喺邊度出嚟，唔一定大晒。

　　又例如腳法秀麗、外型靚，又係咪實有好好前景！？呢點亦有保留，有部分幾好腳法嘅馬，可能會受傷患影響，又有啲或者進度趕唔上。講開腳法問題，當年有匹「拼出魅力」，如果大家唔善忘的話，都會記得佢嘅腳法唔係靚，有啲似打麻雀feel，總之就亂亂哋籠，之但係，隻馬有本事評分去到109分，簡直係專家中嘅專家，佢喺谷草及一哩嘅表現勁到無倫，如果齋睇腳法（頭三兩仗），試問點會估到佢可以有能力，由四班殺到上去一班（首季）！？呢啲破格例子雖然唔算太多，卻令人回味。

洪禮賢