洪禮賢講馬：賀賢馬房強兵反撲

猪拉多纳

　　尚有十多日本港馬季又開鑼，有邊個馬房會大起或大跌？有時真係幾難估，如果係兵力少嘅馬房，成績唔易彈起，係正常預測。

　　上季成績在前列嗰批，告東尼、蔡約翰、大摩、葉楚航、方嘉柏、徐雨石、姚本輝等馬房，好大程度係洗牌咁，頭馬量唔會忽然大跌，排名高啲定低啲，可能只係三兩級上落。

　　至於突破曾跌一跌嘅馬房，如賀賢、霍利時、蘇保羅，前兩者處境比較好，因為上季成績比前退步，並冇令廐內兵力有乜「依郁」，但後者就唔同，現時擁馬廿幾匹，除非之後補給嘅新血貢獻好多，如果唔係，情況唔算樂觀。

三四班馬有憧憬價值

　　講到賀霍兩廐，應以賀賢馬房最有睇頭，兵源多到瀉係優勢之一，當然有部分高分馬已經唔易再上，三四班嗰堆，其實幾有憧憬價值，因為當中唔少馬係減分過籠，或者係上緊嚟，「喜運財星」、「飛躍之旅」、「軍花」、「得男」、「人人醒」等，唔係分利就係有前景。

　　譬如前兩駒，「喜運財星」上季尾加配件上陣即「升呢」，「飛躍之旅」則轉馬房即勝，而佢哋姿態都係贏得輕易，畀人有種幾超嘅感覺。

　　所以，如果賀廐呢批馬生性，潛在力量幾犀利。