日本超班強爆北韓

猪拉多纳

02/09/2011
文： 蘇豪

世界盃外圍賽日本於C組首戰主場迎戰北韓，日軍星級球員本田圭佑受傷無緣披甲，另一猛將香川真司將會乘勢爭做大佬，大軍人強馬壯，應可順利輕取對手，捧「讓球主勝」。




（周五晚6時20分開賽）




隨住愈來愈多球員出國搵食，日本大軍水平愈來愈高，今次本田圭佑因傷缺陣，的確會受削球隊前線侵略性及死球威脅力，不過隊中仍有大批優質進攻球員，多蒙特主將香川真司踢法全面，絕對有條件上位做大佬，加上遠藤保仁及李忠成等攻擊球員狀態理想，進攻絕對唔成問題。


鄭大世孤掌難鳴


日本另有中村憲剛及森本貴幸等球員先後受傷，但現時國家隊確實有好多優質球員，主帥沙哲朗尼補選射手夏雲拿，此子今季於甲府風林一個打晒，今次有機會大顯身手。日軍上場面對宿敵南韓，進攻水銀瀉地輕鬆大勝三比○，球隊防守向來穩陣，今場預計亦可保持不失。




另一邊廂北韓不再神秘，會倚重中場梁勇基分波，前線由鄭大世爭取士哥，條路畀人睇通晒，實在惡唔出樣，今次作客實捱打，捧對家！