德國歎奧地利私房菜

猪拉多纳

02/09/2011
文： 郭球奇

今晚德國喺歐國盃外圍賽A組對奧地利，雖然「日耳曼軍團」飽受傷兵問題困擾，不過勝在兵源充足，加上領隊勒夫揚言要創歷史全勝出線，對住「私房菜」奧地利，1.4倍「讓球主勝」熱都要捧！（now633台及廣東體育周六凌晨2:45直播）




德國近排真係愈踢愈勁，早前喺熱身賽對住巴西，都輕鬆以3:2勝出。喺歐國盃外圍賽A組仲離譜7戰贏晒，今晚只要擊敗奧地利，或者土耳其贏唔到哈薩克，就會成為首支從外圍賽進身決賽周嘅球隊，不過領隊勒夫揚言會全力爭勝，原因係德國從未試過喺大型賽事外圍賽全勝晉級咁話喎。


奧地利近6戰輸5場


係！雖然德國今次對奧地利，一早有前鋒馬里奧高美斯、中場馬里奧葛斯、施雲賓達、基迪拉同馬高列奧斯因傷退隊，不過就有上次對巴西缺陣嘅奧斯爾回歸，加上仲有「小豬」舒韋恩史迪加、拿姆、補選前鋒卡卡奧，以及前鋒舒賀爾尼等新星候命，其實人腳仍然係超晒班。




同德國相反，奧地利近況曳到爆，踏入2011年6戰5敗，包括主場輸畀德國1:2，相信今晚作客德國都係凶多吉少，畢竟隊波好多正選都喺德甲効力，包括史特加前鋒夏歷同獲補選嘅不來梅前鋒阿拿奧杜域等，基本上被對手睇通晒，加上一向被「日耳曼軍團」恰慣，史上42次交手只得9勝，近6次交手更輸晒，根本冇爆冷本錢！


近6次交手德國贏晒


日期 戰果




2011/06/04 奧地利 1:2 德 國

2008/06/16 奧地利 0:1 德 國

2008/02/06 奧地利 0:3 德 國

日期 戰果

2004/08/18 奧地利 1:3 德 國

2002/05/18 德 國 6:2 奧地利

1994/06/02 奧地利 1:5 德 國

橫數千軍

 德國連續5場開大

近8場比賽5勝2和1負，連續5場開大。

史上42次交手（包括前西德）獲23勝10和9負。

 奧地利近8戰得1勝

近8場比賽1勝1和6負，有6場開大。

小組排第4，世界排名68，比德國低65位。