荷蘭大超班「-5」照捧

猪拉多纳

02/09/2011
文： 牛奶仔

今晚歐國盃外圍賽E組賽事，暫時喺小組全勝嘅荷蘭會於主場出擊，迎戰全敗兼0入球嘅聖馬力諾，即使有洛賓等主力缺陣亦能大勝，就算讓球主客和開到「-5」，1.64倍「讓球主勝」仍然值得捧場。（now632台周六凌晨2:30直播）


聖馬力諾終極魚腩


荷蘭雖然近兩場熱身賽都和波，不過佢哋喺歐國盃外圍賽就素有保證，今屆6戰全勝兼入21球，實力明顯超班。「橙衣兵團」雖有洛賓、阿費利、雲達華治同尼祖迪莊因傷退隊，不過仲有史奈達、尹佩斯及古積特等攻擊主力孭飛，對住低幾班嘅聖馬力諾，要爭取7連勝絕對唔難。




聖馬力諾由業餘球員組成，係歐洲嘅終極魚腩，世界排名去到包尾嘅203，喺今屆外圍賽分組賽同荷蘭啱啱相反，踢咗7場全部輸晒，最慘係連一球都入唔到，但就失咗33球，根本稍有實力嘅球隊都可以將佢哋炒起，更何況係荷蘭呢。睇埋往績，「橙軍」喺近6次交手都至少能夠派到4隻光蛋，今次主場出擊唔難再大勝一仗。