昆士柏「平民轉會王」

猪拉多纳

04/09/2011
文： 麥馬拿仁

今夏轉會窗正式關閉，曼城購入阿古路、拿斯尼等猛人勁使7,600萬鎊，穩佔全歐「豪使榜」首位。依家轉會市場發晒癲，球星身價、人工高到離譜，於英超冇大水喉照難上前列，睇阿仙奴失八粒就知乜事。你有你富貴，但我未必閉翳，弱旅教頭只要有眼光，平有平玩一樣掂，昆士柏流浪（QPR）就係「識玩一族」。




升班球隊QPR，免費簽祖爾巴頓係個Good Deal。雖然佢操行零蛋，但落到場鬥心、信心、野心樣樣齊，開咧戰單挑阿仙奴中場不落下風，若非場外是非太多，屬國家隊之材，雖然有傳佢周薪高達十萬鎊，但若領隊禾諾克委以重任，放手畀佢做中場大佬，球隊有力打上中游。


靚價入筍貨有前途


胡禮菲臘斯係另一件筍貨。只要有睇曼城季前熱身賽，就知此名廿九歲翼鋒仲有心有力，邊路吓吓爆、遠射腳腳勁，近季坐多過踢谷谷埋埋，轉飯鑊後分分鐘發光發熱。加埋另一靚翼泰拉拔，二人雙翼齊飛，威力非同小可。




另外，禾帥簽入阿仙奴左閘阿曼特查奧爾，借埋新特蘭中堅安頓費迪南，中後場齊章見得人，差就差在冇個勁前鋒，如果一月執到布里斯托城個美爾納特，QPR季尾有力上前十！