墨西哥嚼智利復仇

猪拉多纳

04/09/2011
文： Yennie

今日雖然冇乜重量級戲碼，但都仲有場墨西哥對智利嘅熱身賽，喺中立場西班牙巴塞隆拿舉行。咪以為兩支美洲球隊對碰冇嘢好睇呀，查實今仗亦係兩大超新星嘅對決，墨西哥嘅「小豌豆」查維亞靴南迪斯會火併智利「神奇男孩」阿歷斯山齊士！




「小豌豆」上季加入英超豪門曼聯即刻有料到，喺27場聯賽射入13球。佢又喺09年以21歲之齡入選墨西哥國家隊，第一場比賽就交出一記助攻，其後3場波仲射入4球添，都幾勁架！「小豌豆」依家代表國家隊已經累積29戰入21球，入球「高效王」並非浪得虛名。


「A山」一樣唔簡單


有智利C朗之稱嘅「A山」阿歷斯山齊士，能夠兼任前鋒同翼鋒等位置，今夏正式加盟「地上最強」巴塞隆拿，仲順利融入球隊兼開齋；喺國際賽方面，佢17歲嗰陣就首次代表智利上陣，18歲射入首個國家隊「士哥」，到依家喺國際賽38場射入14球，一樣唔嘢小架！




睇番雙方最近一次嘅對賽，係今屆美洲國家盃分組賽，當時智利雖則以2:1贏墨西哥，但當時墨西哥唔係派一線球員參賽，智利可算勝之不武！




事實上，睇番墨西哥之前喺美洲金盃出強陣打真軍，就即刻成功奪標，「高效王」「小豌豆」又以5球當選神射手，今晚佢哋回復強陣，大家如果想要Free Lunch，記得支持「小豌豆」嘅首名入球，同埋捧墨西哥2.55倍W，撐佢哋成功報美洲盃落敗之仇啦！




半隻腳踩咗入o靚模界，但最後決定以學業為重。如今畢業在即捲土重來，希望大家支持。外國波、本地波都係佢「飛佛」。

微博傳情

上星期四上晝考完試，下晝我就即刻趕去西貢出海玩Wakeboard。點知一去到，個天竟然烏雲密布落大雨，仲要有雷暴警告添，出海先嚟落雨，唔通連個天都唔鍾意我 ? 好彩出到海之後又變番一滴雨都無，個海仲要水平如鏡，啱晒我呢位初學者學跳Wake啦！經過星級教練嘅指導下，我學識One Wake喇！每次學識一個新動作之後，都會好有成功感同滿足感。另一方面，本地足球聯賽亦都開League喇！一向熱愛本地波嘅我，都會親身到場欣賞比賽，支持各支港甲球隊，到時球場見！