東京中場靈魂擔正伐櫪木

猪拉多纳

04/09/2011
文： 走肖

FC東京今日喺日乙主場對櫪木SC嘅榜首大戰，1.68倍主W熱都抵捧。近期東京連輸2場，榜首位置開始坐唔穩，日本傳媒透露中場靈魂石川直宏有望相隔281日後再次打正選，目的唔使多講啦，當然係攞3分，「回魂」點可以唔撐到底？（開賽時間：周日下午5:00）




喺兩個星期之前，FC東京作客以1:2不敵櫪木SC，跟住又輸埋畀富山勝利，依家畀對方追到同分，後衞今野泰幸同門將權田修一又要代表日本踢世界盃外圍賽，情況都咪話唔危急，據講東京教練大熊清唔只放德永悠平踢加閘加強防守，仲打算安排前國腳石川直宏，自上年11月27號後因傷缺陣以來首次正選出戰，希望借用佢嘅創造力同把握力，打沉櫪木兼坐穩榜首，出動到終極武器，證明佢對呢場波有幾重視，唔撐對唔住自己。


櫪木近3戰共失5球


雖然FC東京傷兵問題仲未有改善，中鋒平山相太、施薩羅拔圖、高松大樹、中場米本拓司同羅拔圖都要養傷，但其實佢哋之前已簽入曾經幫過大阪飛腳奪得亞冠盃冠軍嘅前鋒盧卡斯施維連奴，擺到明要以冠軍身份重返日職，鬥心爆棚要得過。




至於近15場有7勝7和1負嘅櫪木，向來被視為J2一支擅攻嘅強隊，最近又簽到個前鋒沙比亞同射手列卡度盧保合作，不過呢期佢哋後防唔穩陣，近3場勁失5球，作客東京要保住不敗，唔容易喎。