洪禮賢講馬：嘉年華閘的啟示

猪拉多纳

　　「時尚風采」、「綠茵神駒」、「延續美麗」、「加州財子」、「寶正勁」及「喜寶龍威」，以上6駒係日前試嘉年華閘嗰6組頭馬。佢哋贏到之後（唔好理究竟點贏住先，開晒鞭咁贏，或輕易完成又好），有幾多匹可以季內一出就跑得好，放長雙眼去睇吧。

　　早幾季之前，曾經要做季前特輯，少不免要「自我增值」，拍之前幫吓手做啲數據，大方向係關於季初以咩渠道揀馬。容易諗到而又直接嘅，梗係嘉年華大閘。雖然當年實際數字冇喺手，但記得攞咗好幾季該閘前三名嘅馬作據，睇番佢哋試得好之後，係咪一出都會好，結果發現兩者真係掛鈎。

　　不過，近季再做番相關數據，情況時有出入，點解趨向有變？第一念係覺得暑假縮短引起嘅連鎖反應，因現時再唔係6月中或尾收咧，相距日子冇以前咁長，或令嘉年華草閘發揮嘅功效不如前。

　　遠嘅唔好講，上季28/8嘉年華閘嗰6組頭馬，初出無一能勝，只跑二至六名（但09年7組嘉年華閘頭馬，初出僅1駒冇前四名）。而攞番當時8月首兩次泥閘頭馬比一比（因共6組閘），至少有「精英財星」和「進取」入到前兩名。雖然咁樣比較未盡完善，不過，可反映一樣嘢──嘉年華閘嘅功效，應該有，除非冇！

馬會賽馬節目主持　洪禮賢