細哨回歸巴西發威

猪拉多纳

05/09/2011
文： 法比加輝

國際熱身賽重頭戲，巴西會在中立場倫敦嘅卡雲小屋球場迎戰加納。巴西領隊文奴文尼斯掌帥後交唔出成績，美洲國家盃八強止步，上場熱身賽又輸畀德國，受盡千夫指摘，所以熱身賽都冇得「揸流攤」，鬥心信得過！巴西今場有老將朗拿甸奴回歸，「細哨」係陣中新星嘅偶像，相信會增強「森巴兵團」士氣，今場一於揀巴西W。




（周二凌晨2時45分開賽）




曾揚言要為巴西重拾森巴味道嘅文奴文尼斯，上任後都真係冇齣好戲，美洲國家盃四戰有三場贏唔到，恥辱地八強止步，而上場熱身賽又被破金身，十八年來首次輸畀德國，劣績不絕，文帥難免萬箭穿心。因此縱然今場只係熱身賽，但巴西都冇得「揸流攤」，文帥一定想贏波紓緩壓力。


神級偶像起作用


事實上，大部分巴西主力如施薩索拉斯、盧斯奧、丹尼爾等都有獲徵召，不過焦點當然落在重返國家隊嘅朗拿甸奴身上，「細哨」回流巴甲後重拾第二春，半季聯賽已射入十二個入球，狀態弗到漏！其實加輝都贊成重召「細哨」入伍，事關自從卡卡缺態失勢之後，「森巴兵團」明顯少了領軍人物，導致成績下滑。羅賓奴冇領袖才能，而甘素同尼馬又未夠班擔大旗，故此「細哨」嘅回勇，正好係巴西嘅及時雨。再者唔少年輕球員都視「細哨」為偶像，難得同偶像並肩作戰，落場都畀多兩錢肉緊啦。


加納頻撲靠唔住


反觀加納鬥心就認真成疑，佢哋三日前先踢完非洲國家盃外圍賽，急急忙忙又要從非洲飛到歐洲同巴西拍跳，好難有十足戰意，就算係有心都冇力啦，所以加輝撐巴西贏波。