細哨回歸 巴西玩殘A貨加納

猪拉多纳

05/09/2011
文： 朱楓

細哨返嚟啦！闊別9個月，朗拿甸奴今晚終於再次披上「森巴戰衣」，以佢近期弗爆狀態，今晚喺英國倫敦同加納拍跳，絕對有力帶起巴西重拾霸氣，適逢加納因為臨時拉夫，賽前講明今場會出副選試陣，朱楓梗係撐細哨玩殘呢隊「A貨加納」，捧2.05倍「讓球主勝」啦！（開賽時間：周二凌晨2:45）




因為係2014年世界盃主辦國唔使踢外圍賽，巴西近排頻頻安排熱身賽練兵。本來「森巴兵團」今場應該作客埃及，但因為當地近排政局動盪，為安全計被迫取消，改喺富咸嘅卡雲小屋球場同加納拍跳。由於有巴西孭飛，據講呢場波銷情唔錯，早三四日已賣出超過一萬張波飛，相信今晚一定好熱鬧。


群星照細哨獨欠羅賓奴


巴西今次大軍最大焦點，必定係朗拿甸奴闊別9個月後重返國家隊！細哨今季重返巴甲加盟法林明高後，完全重拾巴塞當弗時期嘅勇態，暫時以12球排巴甲射手榜第2位，早幾日更加開角球直接彎入網建功。難得今次重披「黃金戰衣」，朱楓相信細哨必定施展渾身解數，以求keep住繼續入選踢2014年世界盃，加上尼馬、丹尼爾、柏圖、盧斯奧等球星，即使羅賓奴因傷臨時退隊亦唔係大問題。


頻撲加納派副選應酬


難得對戰巴西，加納一收到邀請立即應承，但其實佢哋賽程密到爆，早三日先喺非國盃外圍賽對斯威士蘭，表現勁曳好辛苦先贏2:0，贏完就拿拿臨趕去倫敦對巴西，但據講射手基恩喺比賽中受傷今晚好大機會缺陣。




領隊史提芬奴域都知自己「捉蟲」，咁頻撲玩死一班正選，賽前竟表示今晚會改派布里斯托城前鋒艾度馬、法甲伊維恩中場拉比奧同馬賽射手阿休個細佬佐敦阿休呢啲小將上陣，希望佢哋從中吸收經驗，擺明想試陣，咁樣對住矢志翻身嘅細哨，你唔係覺得加納仲有機會爆冷呀？


橫數千軍


 巴西8戰半場不敗

‧近8場3勝4和1負半場不敗。

‧朗拿甸奴暫時以32球排巴西史上射手榜第8位。

加納交手往績輸晒

‧近8場4勝3和1負，對上5場都有波入。

‧近3次交手全敗勁失12球。