丹麥主場再攞威

猪拉多纳

06/09/2011
文： Mic少

歐國盃外圍賽H組上演北歐雙雄對壘，丹麥主場迎戰挪威，北歐球隊一向friend底，但依家形勢危急，兄弟都冇面畀，尤其係丹麥現時喺小組落後，想爭出線，就要趁地利迎擊近六次到訪輸五次嘅挪威，捧1.8倍主勝。




（now 631周三凌晨２時15分直播）




北歐球隊除咗踢法相似，亦建立緊密關係，從而抗衡歐洲列強，大家應該記得04年歐國盃決賽周，丹麥同瑞典夾計打和二比二，令意大利出局。今屆外圍賽Ｈ組，形勢變成丹麥同挪威圍堵葡萄牙，不過現時情況完全唔同，丹麥落後葡國同挪威兩軍三分，但踢少一場，不過丹麥之後仲要惡鬥葡萄牙，如果今場贏唔到攞足三分，好可能會被踢出局，背水一戰可秤先。


挪威近６作客丹麥５敗


事實上，挪威本身實力亦唔高得過丹麥，上周主場對同組包尾嘅冰島，都要踢到完場前兩分鐘，先至靠博到十二碼險勝一比○，贏得毫無說服力，今仗就算出真功夫，亦未必夠丹麥打。丹麥上周輪空，可以全力備戰今場生死戰，加上佢哋近六次主場對挪威贏五場嘅佳績支持，相信今場可以再攞「威」。