國足定出線決賽周獎金

猪拉多纳

06/09/2011
文： 蘇豪

中國於世界盃亞洲區廿強賽第二輪作客約旦，賽前內地傳媒報道國足出線獎金，若打入決賽周全隊分到1,500萬元人仔，主帥甘馬曹個人收入則有望超過9,000萬人仔。為爭奪巨額獎金，國足將帥都會小心翼翼，決心穩中求勝，今場捧「細」最好！




（廣東體育周三凌晨零時直播）




中國今次使出銀彈戰術提升士氣，據內地傳媒爆料，如果打入十強賽，球隊會獲得500萬元人民幣獎金，如能成功躋身世界盃決賽周，獎金數字更會激增至1,500萬人仔，實在非常吸引。國足若能參戰世盃，保守估計會帶來超過5億元經濟效益，甚至有機會達到10億以上，相比之下，呢筆獎金濕濕碎啦。




國足如果取得世盃決賽周席位，新帥甘馬曹又點會冇得分吖，根據傳媒分析，甘馬曹除稅後年薪達到280萬歐元，三年合約加埋有840萬歐元，計埋商業收入，額外收益最少有200萬歐元，求其加埋條數已經過千萬歐元，折合超過9,000萬元人仔，可謂「錢」途無限，相信呢位名帥唔會放過掘金良機。


作客約旦守「細」波


中國將帥有巨額獎金支持，鬥志毋須懷疑，不過，今次作客約旦，對手屬小組主要競爭對手，實力唔弱，國足去到人哋地頭作賽，唔輸已有交代，相信甘馬曹會小心部署，要求球員做好防守，再搵機會突襲，預計會踢得較為保守。




國足首輪賽事主場反勝新加坡，表現唔算太好，今仗中場黃博文及守將杜威有傷上陣成疑，但影響唔大。

另一邊廂，約旦首戰作客打敗伊拉克，表現令人眼前一亮，今次回師主場乘勝追擊，兩隊級數差唔遠，入球能力同樣一般，「細盤」都幾穩陣。