洪禮賢講馬：姚廐首戰有雄心

猪拉多纳

　　周日開鑼賽，兩個馬房冇馬報名（胡森及高伯新），另一方面，自然有啲馬房特別踴躍，像前文提過東廐，已經撐晒場，報夠12匹，同時，姚本輝馬房亦熱情，11駒出報而有10匹係正選，大概唔只係為霸位咁簡單（之前兩季首戰，此廐有9及7駒出戰）。

戶外名駒利新鮮

　　如果逐匹逐匹嚟秤，表面上，東廐嗰批比較揀得上手，但先旨聲明，只係初步評估形勢，並唔係話姚廐冇本事大舉出擊，至少有匹幾利新鮮嘅「戶外名駒」，撇開1400米路程略短、重磅、評分喺高位，呢啲已知嘅負面條件，話晒對上兩季隻馬喺胡、姚兩廐，首兩仗成績為2W1Q，儲埋儲埋嘅嗰股潛在力量，點可以睇小？！

　　除此之外，姚廐「中環英雄」點都係惹飛之馬，始終未轉倉前已經公認係前景幾好，撼得贏7W明星「雄心威龍」，就算打個7折，二班依然「買上唔買下」。而轉馬房後，初出可擊敗「如願以償」，後駒輸完後連勝連升，上埋二班，評分過埋9字頭，目前72分嘅「中環英雄」，仲唔係超筍。而睇佢之前草閘，全程試起上嚟畀人感覺良好，如果呢場形勢有得追，仲唔開正佢嗰瓣。