洪禮賢講馬:苗廐作風轉急進

猪拉多纳

　　之前提及過東姚兩廐在首日出馬幾多，其實，苗廐都有9駒獲正選，隊形唔係細，可唔可以即刻打開勝利之門？成數唔係冇，睇過此廐部分報名馬操練流程及實力，秤落唔係冇爭勝機會。

　　其實，此廐近季初段方針，經已略有分別，以近3季為例，大前季苗廐要到10月先取得該季第1W，但到了近兩季情況明顯唔同晒，前季首兩個月，已交出6場頭馬（9月份1W）。

　　上季苗廐在頭兩個月更加進取，快快手攞了8W，12/9仲炮製季內首次同日兩捷。

　　由此看來，苗禮德對於季初搶攻心態愈見着緊，所以，此廐就算首戰冇影，唔代表9月份唔會急於求功。

雄心馬主有威脅

　　至於今期賽事，五班「雄心馬主」，出戰田草1400米，路程最啱，8歲老馬，又冇乜好等，吼準首戰郁手，未嘗唔係好事。雖然，季前冇大閘，程序唔似得上季初咁，但有可能老了，唔使壓迫咁大；講到能力，上季尾落到五班，跑兩場1400米，贏唔到但輸近，只係分別以短頭輸畀「時時有機」及以頸位輸畀「成功年代」，證明呢個班次幾着數，只要跑到水準，在今場已具威脅。