7國爭霸都係AC天下

猪拉多纳

09/09/2011
文： 亨利

等到頸都長，萬眾期待嘅意甲今晚終於開咧啦！小弟「亨利仔」今季有幸同《太陽波經》嘅讀者傾波經，希望大家場場得勝啦！講番意甲，「亨利仔」真係超期待，尤其係好想睇吓愛隊拿玻里，同其他意甲Big5到底可唔可以搞到AC米蘭冇啖好食！但講真嗰句，「紅黑軍團」人腳真係超班，如無意外，今季都係佢哋嘅世界喇！


拿玻里始終係「飛佛」


多數人睇意甲，都係支持米蘭雙雄、首都孖寶或者祖記，不過「亨利」口味就比較特別，鍾意拉素、巴勒莫同拿玻里，貪佢哋踢法快上快落嘛！尤其係拿玻里，可能因為細個鍾意馬納當拿啦！事實上，拿玻里近年表現真係愈嚟愈好，中場咸錫又型又好波，勁有星味，假如今季可以兼顧到歐聯，拿玻里要繼續打入三甲應該唔難。




至於其餘各路大軍，祖記、羅馬、拉素、國米、烏甸尼斯都OK㗎，我個人最期待就係羅馬。新帥安歷基係紅褲子出身，假如可以成功安撫托迪，肯定大有作為。咁祖雲達斯呢？好多人都話佢哋今季大事增兵勁咗好多，但睇番胡仙歷嗰啲根本唔算頂級球星，睇落冇咩朝氣，入前4已經執到！


加度素：科蘭死路一條


不過講到爭標，「亨利」始終睇好AC米蘭！「紅黑兵團」近年表現好穩定，人腳又勁，相信今季可以輕鬆冧莊。「亨利仔」尋日上網搵料，發現AC獲阿聯酋航空嘅球衣心口贊助，每年有成1,200萬歐元（約1.3億港元），係意甲之首，有條大水喉射住，士氣點都好啲嘅！




仲有，中場加度素日前受訪嗰陣，直指烏拉圭射手科蘭加盟「藍黑軍團」冇運行：「科蘭唔能夠代表國米踢歐聯，佢作出咗錯誤嘅抉擇，死路一條！」未開咧已向死敵噴口水宣戰，信心爆晒燈，「亨利仔」睇好AC可以衞冕，梗有原因嘅！