由心出發撐華倫西亞

猪拉多纳

10/09/2011
文： 山度士

今晚西甲壓軸好戲由華倫西亞主場鬥馬德里體育會，講真兩隊實力差無幾，勝負好睇臨場發揮，不過度士個人偏好比較平穩嘅華倫西亞，今場由心出發撐主隊。




（now 632及635周日凌晨4時直播）


馬體會要重新適應


近年西甲由巴塞、皇馬壟斷，華倫、馬體會、維拉利爾、西維爾呢類二線球隊目標只係爭第三，喺度士心目中，以上幾支球隊實力真係好接近，短兵相接邊隊贏波都唔算爆冷，係場名副其實嘅五五波。如果真係要揀一隊，度士會傾向主場出擊嘅華倫西亞。華倫近年雖然不停放走陣中主力，不過佢哋勝在踢法夠整體，唔會冇咗一、兩名球員就即刻走晒樣，睇吓首輪大勝桑坦德四比三、蘇爾達杜連中三元就知佢哋攻力冇減弱。馬體會過去數季都以阿古路、科蘭作為前線重心，今季一次過放走兩人，預料要花一段時間重新適應。




前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。