拿玻里起塞冧老闆

猪拉多纳

10/09/2011
文： 巨高

意甲有三個老闆最多口水，除咗ＡＣ米蘭嘅貝魯斯干尼以及巴勒莫嘅森柏連尼之外，第三個就係拿玻里班主迪羅倫迪斯，呢個電影出品人鍾意出風頭，成日都話要打破米蘭雙雄嘅壟斷局面。撇開老闆為人唔講，其實拿玻里班波一向鬥志鮮明，意甲新球季首場作客對住降班熱門切塞納可望順利勝出，客W有分頭捧得過。




（周日凌晨2時45分開賽）




事實上，迪羅倫迪斯唔係得把口，今年暑期唔單止成功挽留教練馬沙利，而且進攻三寶包括卡雲尼、咸錫及拿維斯亦繼續留効，似乎迪羅倫迪斯向四人落過唔少嘴頭；另外佢亦喺轉會市場引入瑞士高質中場恩拿及馬其頓大帝彭迪夫，令球隊陣容比上季更見完整，對爭勝必有幫助。


梅度過晒氣難助切塞納


咪以為拿玻里下周中要出戰歐聯，今場意甲就會勒住踢，教練馬沙利曾經講過，那不勒斯球迷要求好高，佢哋要睇到所有球員都全力以赴，明知唔夠踢都要拚到底，所以「留力」一詞唔會出現喺拿玻里身上。尤其今場係新球季頭炮，老闆迪羅倫迪斯好大可能到現場睇波，拿玻里更加唔可以失威。




切塞納今季較注目嘅收購係梅度，論腳法當然冇問題，但早年為提升性能力而過度「索曲」，令到身體機能急劇下降，現階段未必對切塞納有太大幫助，球隊整體實力唔會好得過上季。拿玻里質素超晒班，客場贏弱隊好正路。