皇馬「大」戰基達菲打甩髀

猪拉多纳

10/09/2011
文： 郭球奇

皇家馬德里今季一出閘就開個「客其他」的確係勁，但今晚喺「馬德里打吡」主場對基達菲，要再炒多鋪就唔係咁易，事關佢哋中咗「FIFA病毒」，「葡國孖寶」又爆內訌，考慮雙方近年交手多數大手交易，球奇今場寧揀入球大細中位數設3.5球嘅1.65倍入球大！




（now632及635台周日凌晨2:00直播）


15國腳染「FIFA病毒」


今季矢志要擊沉巴塞嘅皇馬，一出閘就取得一個好開始，作客大炒薩拉戈薩6:0，不過隊中15名球星之後因國際賽離隊，據講總出場時間達1,947分鐘，飛行路程達12.3萬公里，當中C朗唔止去踢歐國盃外圍賽，日前仲抽空出席自己紀錄片首映，撲嚟撲去都咪話唔辛苦，難怪有傳教練莫連奴今晚可能先出卡卡同狄亞拉啦！




同C朗一樣，卡維奴同比比日前都返咗葡萄牙大軍，不過卡維奴之後突然發脾氣離隊，據報呢位中堅係因為不滿比比賽前冇操都有得踢正選，反而自己被貶後備。雖然日前有西班牙傳媒影到C朗做「和事老」，令兩人和好如初，但落到場隨時口和心不和都未定，後防中路有呢對「計時炸彈」，都咪話唔牙煙，唔好唔記得皇馬嚟緊周中仲要展開歐聯賽事作客薩格勒布戴拿模，今場唔去盡絕對合情合理。


基達菲傷兵多達7人


首仗主場打和利雲特1:1嘅基達菲，雖然今場唔可以出啱啱由皇馬借番嚟嘅中場柏度李安，有傳仲有多達7名球員有傷在身，不過就有中場沙拉比亞同後防米基爾托利斯倒戈，唔使講一定加多兩錢肉緊，前面又有件前西甲神射手古爾沙，對住皇馬絕對有還擊之力。事實上，基達菲近6次對住皇馬，竟然有4次射入對手2球或以上，開出5次入球大，今晚真係值得再追。


雙方對賽愛鬥大


日期 戰　果

2011/05/11 皇家馬德里 4:0 基達菲

2011/01/04 基達菲 2:3 皇家馬德里

2010/03/26 基達菲 2:4 皇家馬德里

日期 戰　果

2009/10/31 皇家馬德里 2:0 基達菲

2009/04/21 皇家馬德里 3:2 基達菲

2008/11/29 基達菲 3:1 皇家馬德里