巴塞「大」得起皇蘇

猪拉多纳

10/09/2011
文： 鄭少偉

西甲第一場就喪炒維拉利爾5:0嘅「地上最強」巴塞隆拿，今晚作客對住實力比「黃色潛艇」差幾皮嘅皇家蘇斯達，就算賽前傳出主帥哥迪奧拿會收起3大主力，改由法比仔同A山齊士擔正，睇怕一樣可以再演入球騷，「亨利」建議今場簡簡單單，捧2.02倍入球大就最穩陣喇。（now632、635台周日凌晨0:00直播）




巴塞鋒力強係人都知，但大家可能會問，早前嘅國際賽會唔會搞到啲球員因為舟車勞頓，影響發揮？小弟就認為冇有怕，西班牙啱啱大勝列支敦士登，過程十分輕鬆，就好似一課齋練射門嘅練習咁，巴塞教練哥迪奧拿可能要多謝西班牙領隊迪保斯基幫佢操咗班主力一課添啦！


法比腳風順 佩奧爾復出


賽前雖然有消息話哥帥會收起韋拿、沙維同傷愈嘅碧基，佩奧爾就會復出，不過睇番補入嘅快翼阿歷斯山齊士、中場法比加斯，以及移落後防嘅布斯基斯咪一樣穩陣。特別係近期腳風順到痹嘅法比加斯，佢重投母會之後呢兩場都有「士哥」，畀佢打正選真係勒都勒唔住呀！




巴塞火力強橫，皇蘇就算喺主場都預咗捱打，但都唔係一啲還擊之力都冇，話晒佢哋係現今西甲球壇幾支掛住「皇家」牌頭嘅球隊之一，喺自己擁躉面前，誇啲講，就算輸都要你為贏波付出代價！咁皇蘇有乜架生同巴塞死過？最大名氣一定係卡路士韋拿，呢個阿仙奴借將技術相當到家，加埋上場贏波功臣阿基列斯，一個速度快、一個神高神大，應該威脅到巴塞後防，望佢哋入到波輸波，個大就開到o架喇！