阿特蘭大罰得輕有天收

猪拉多纳

11/09/2011
文： Mic少

古代有未見官，先打八十大板，今季意甲未開咧，新升班球隊阿特蘭大已先被扣六分，事關佢哋衰打假波，呢個判罰再次反映意大利足總根本唔夠決心打擊假波問題。體育運動最強調公平競技，舞弊作假屬於「死罪」，有乜理由只係扣分就算數，即使唔罰佢哋降落丙組，都應該禁止升上意甲，但意大利足總照畀佢哋升班，令意甲個朵愈來愈臭。意甲近年矚目度大減，同被揭發多假波有重要關係，但由於牽涉眾多利益集團，執法當局亦唔清廉，想徹底打假，好難囉！


作客熱拿亞聽炒


Mic少作為意甲擁躉，惟有寄望阿特蘭大盡快降班，相信呢個願意應該唔難實現，畢竟由負六分起步，肯定嚴重打擊呢隊「升降機」嘅士氣，特別係靈魂人物當尼亦因為打假波，被罰停賽三年半，球隊頓失重心，更加難克服逆轉，加上季初未適應意甲比賽節奏，情況必然更惡劣。阿特蘭大今晚首輪意甲作客熱拿亞，隨時大敗，建議捧熱拿亞「讓球主勝」。（周日晚9時開賽）