川崎陷信心危機 勝利船撻着有計

猪拉多纳

11/09/2011
文： 走肖

人大咗，就愈會明白「希望愈大、失望愈大」點解。川崎前鋒今晚喺日職主場對神戶勝利船，情感上好希望前鋒贏波終止7連敗，但實情佢哋陷入信心危機，對住喺榜尾浮番上水面嘅勝利船（上圖右）贏面唔大，唔想同錢作對就要捧1.9倍「讓球客勝」。（now634台周日晚6:00直播）


前鋒創會首次7連敗


前幾年去川崎採訪，佢哋無論球員、職員定球迷都超級友善，所以特別留意有關前鋒嘅新聞，今季佢哋用講開波嘅相馬直樹做教頭，原本已經冇咩期望，但真係估唔到會遇上創會以來最悲壯嘅7連敗，日前佢哋喺川崎競馬場舉行球迷感謝日，吸引5,688名擁躉入場，球員又扮女人又跳舞，目的都係氹番球迷開心。


神戶近6場入13球


雖然相馬直樹覺得，國際賽期間球員已經回氣，而且前鋒以往喺聯賽主場對勝利船有5勝1和，寫包單今場會贏波反彈，但個人認為呢啲只係佢主觀願望，因為前鋒兩大中場中村憲剛同稻本潤一仲未好番，改變喪攻打法後全隊又失晒魂，幾乎冇晒爭勝決心，對住近6場入13球，撻番着鋒線嘅勝利船好難有得贏。