綠茵串甘美奧W迎中秋

猪拉多纳

11/09/2011
文： BlackJack

草津溫泉呢班波今季進步咗，但係今日無情情移師去熊谷文化公園陸上競技場出戰東京綠茵，等於放棄主場優勢，一於博綠茵開到客W，再過落去比拉馬入球細，同埋甘美奧主場W度，搵番啲中秋使費。


草津失地利贏完例失分


草津呢隊日乙波，向來用群馬縣個正田醬油體育場做竇，不過今日佢哋轉咗去熊谷個場打波，呢個場雖然幾靚吓，但係草津甚少响度出戰，班球員對個場地嘅熟悉程度，恐怕好唔過客軍綠茵幾多，而且由往績去睇，草津近7次主場對綠茵只得1勝3和3負，完全處於下風，加埋近7場波，草津贏完1場，下一場一定W唔到，形成一個單跳，今仗輪到要失分，只得森勇介一件停賽嘅綠茵，贏面起碼高半線。

夜晚場葡超比拉馬對利亞拿，如果大家網上搵到呢場波嘅直播，就會見到個大陸前鋒張呈楝，呢個口靚仔今季至畀利亞拿放棄咗，轉咗去比拉馬搵食，兼且3連敗嘅利亞拿，响幾日前炒咗帶佢出身嘅教練，真係新仇舊恨共冶一爐，張呈楝實會搏命希望整瓜個前東主。之但係比拉馬入球能力較弱，開季3戰有2場踢成0:0，玩入球細正路啲。


足智彩睇死聖保羅


聽朝清晨巴甲甘美奧對聖保羅嗰場，計排名、往績主隊都冇着數，偏偏足智彩就睇好佢哋些少，嗰個2倍主W仲係芸芸莊家裏面最熱一個，不妨攞嚟博吓