歐聯勁爆開騷巴塞AC追月大匯演

猪拉多纳

13/09/2011
文： 巨高

中秋追月夜，歐聯開戰時！今晚歐聯卅二強分組賽強勢Kick-Off，重頭戲必數H組王者之戰，由上屆盟主巴塞隆拿，迎戰意甲冠軍AC米蘭。近年中東油資不停注入歐洲球壇，英超曼城、西甲馬拉加、法甲巴黎聖日耳門均由中東財團支持，今場兩大球會亦唔例外，巴塞球衣胸口贊助商係卡塔爾基金會，而AC就係阿聯酋聯合航空。當逾億人欣賞緊巴塞及AC如何大激鬥時，兩間中東公司嘅招牌就賺盡九十分鐘Air-Time，遂成今場歐聯大戰嘅真正大贏家。


（有線61、201台周三凌晨2時45分直播）

中東贊助商成大贏家

中東人向高檔體育投入大量資金已經唔係新鮮事，除賽馬業務外、近年賽車及足球亦成功打動到中東人掏腰包。大家都知上述體育項目被列作「燒錢類」，仲要係有出冇入蝕到入骨嗰隻，但中東人為要急速宣傳自家品牌及公司，故不惜以龐大資金收購多間歐洲球會，更瘋狂地向其他歐陸名牌球隊注資贊助，巴塞隆拿及AC米蘭就成為受惠者。藉着商業球隊強大嘅宣傳效力，呢類牌子好快就會喺觀眾嘅腦內搵到落腳位。

槍炮互轟勢演入球騷

作為一支商業球隊，奪標事小賺錢事大，話之你每季捧盃，盤數唔靚等同自殺。他朝一日破產散班，仲要孭起一個對球迷及股東不負責嘅罪名，難怪巴塞都要放棄引以為傲嘅傳統觀念，為錢財而打開胸口。而AC亦都唔會為貝老闆旗下公司賣廣告，同樣以高價將胸口出賣畀中東人。表面睇落中東財團有錢有面贏盡所有，但球隊肯與油資相互合作謀求雙贏局面，其實對兩方長遠利益都有好冇壞。


至於菠菜方面，考慮到巴塞隆拿及AC米蘭都係以攻力見稱嘅球隊，相信今場入球數字會偏高，大盤值得留意。

有績可尋

巴塞隆拿與AC米蘭曾經十一次對賽，兩隊各勝四次，另外三次打和。如果單計巴塞主場，巴塞則獲兩勝兩和一負，唯一落敗為○○年九月。值得留意AC近四次到訪魯營，無論輸贏均開出「半場和」。