棟悉先機：一定爆谷戰最強

猪拉多纳

　　谷草A欄賽事，本來賽道比較公平，但經驗累積，咁多年嚟，季初呢類谷草場合，都係揀多啲擺前走嘅馬會有着數，所以，阿棟今期嘅大貼士，大方向都會係以呢個思維，當然唔係話完全側晒喺一邊，1匹後上馬都唔愛，但比重會少好多。

　　第三場四班1000米。「超勝」在四班地位是何等高，谷草1000或1200米一樣吃得開。而查吓往績，發現隻馬初出表現零舍醒，前季初出同程得第二，上季一出就喺1200米勝出。問心嗰句，霍利時向來季初階段唔係特別叻，呢匹馬可以連續兩季喺季初發圍，唔係特利休後戰係咩？！有埋好位，隔夜十幾廿倍W，阿棟點會唔心動！

　　第四場四班1200米。「超晒班」喺三班超唔超，係將來嘅事，但此馬四班一定超，上季贏同程嗰場，馬鞍滑移仍可一放到底，完全係實力嘅表現。呢次係冇好檔，7檔可能有啲風險，但用嘉晉仔，由133變123磅，真係着數到暈。只要早段唔係被頂出三叠，亦咬到喺前面，以呢個磅跑，二叠都蝕得起。

　　第八場二班1200米。「一定爆」係谷草短途強中強，跑4場獲2冠2亞，準在1000米或1200米都掂，嗰度本事嘛！呢次衰在排12檔，蔡仔救唔救到，要睇決心及賽事形勢，如早段有對手唔生性喺埋便頂住晒隨時瓜得，不過，睇落今場唔係太多快馬，希望佢早段帶得出，有權放到。

點買法

　　開場白講咗傾向吼跟前嘅馬，買W又點會揀後上馬，「超晒班」射「一定爆」係必然選擇。至於重心Q場次，尾場以３做膽，希望係熱門收場，腳拖４同６，如果買TF，要埋８、９一對馬。

資深評馬人　陳華棟