洪禮賢講馬：神箭金剛快馬當先確叻星壽比南山

猪拉多纳

　　睇過對上3期谷草A欄賽事結果，檔位方面仍以1至5檔最理想，好似上季7月嗰期，當晚有半數場次係由1至5檔馬包Q，如果呢次又係近似模式，鍾意外檔馬便要三思了。

重心場次　第2場　第五班（40-15分）1650米

　　「神箭金剛」從近兩季早段搏馬習性而言，今仗用柏寶，的確係正面到不得了嘅配搭，只要今場唔係早段慢鬥慢，而場地又唔係完全不利追，以佢嘅卡士，直路唔會有幾多匹對手夠佢衝。

　　「確叻星」另1匹五班超班馬，不過，跑法同前駒一樣咁蝕，又係要望前中段扯得快。「壽比南山」上季喺四班谷草1800米入Q嘅過程「恐怖」，末段追得多夾勁，目前比當時低10分，真係減過籠，如果唔係又無故慢閘或跑錯晒，一哩稍短仍有得爆。

　　「快馬當先」7檔少少尷尬，同埋1000磅唔夠，要負132磅，點會冇影響，最多作配。「迅者」、「標青」，性能相近，本可齊齊慢鬥慢，惟今場尚有三兩駒會早段走，未必有形勢。

第1場　第五班（40-15分） 1200米

　　「好笑容」未轉倉前四班谷草1000及1200米成日近，係實力或進度問題唔使再諗，落班已經係另一回事；本身有速度，如加罩令牠更投入而唔係過促，應有接近演出。「飛天龍駒」上季初跑谷草，就喺此程輸近，嗰場出閘好慢，直路又衝得唔順，以此推算，落班好有競爭力。

　　「團隊福星」係驚10檔影響大，計賽績應屬今場主角之一。「金大人」1檔係好，但早前大閘省得好緊要，先至喺前列返嚟，唯有希望省完有幫助，同埋要破自己5季初出唔上名宿命。「盈驥」初出例上名，當要尊重數據。

第3場　第四班（60-40分） 1000米

　　「喜萬家」四班賽往績好好，季前又唔係冇做嘢，講到谷草1000米，能鬥「旅英駿駒」、「勁勇士」，實力已證明過晒。「健康精英」係唔知初跑谷草適唔適應到？但論近況，的確唔錯，希望試閘嘅速度，落場跑一樣交得出。

　　「王者先鋒」上季贏同程犀利，但爆一段跑法，要視乎前兩駒早段點互動。「超勝」連續兩季初段跑得好，屬少數此廐例子，值得尊重，當然，喺四班谷草亦有優勢。

第4場　第四班（60-40分） 1200米

　　「超晒班」有速度，唔使負重，條件好過大部分對手，如果7檔唔係令隻馬擺錯晒位，三甲穩陣。

　　「新薪」上季暑後工序兩度「甩咳」，一出都贏四班此程，而呢次賽前準備冇問題，分數又同上季差唔多，或可歷史重現。

　　「團隊精神」冇1季初出可上名，重磅也影響大，但落班覺得太筍，唔敢唔拖。「超綵」暑後明顯比前壯身，係擔心路短問題，如成冷，可先拖一注。「金獅駿將」又係另一霍廐季初成日好之馬。

第5場　第四班（60-40分） 1650米

　　「南陽望族」早復課、做嘢多，安排試埋大閘，整套準備有晒初出即搏心意。「旅遊小子」四班谷草一哩有晒佳績支持，如8檔際遇非太差，可起作用。

　　「心路」唔跑短途熱身，以大閘開氣，初出即報一哩，或想打快攻。「大喜象」季前有兩大閘在先，屬此廐少之又少操練模式，如10檔不影響，跑到去季同程輸近水平，夠用有凸！「再來旺財」及「萬子千紅」，TF配腳。

第6場　第三班（80-60分） 1000米

　　「精靈勇駿」準備流程足夠，2檔唔難攞欄帶，可帶到。「太極至尊」初出例上名，谷草1000米又擅長，而之前開鑼日，部分廐侶冇大閘亦可跑得好，希望佢都得。

　　「橫掃千軍」弊在前兩駒在其內側，早段略有可能會蝕啲，只宜作配。幾匹大「冧吧」馬之中，「享耆成」算是條件較好1匹。

第7場　第三班（80-60分） 1650米

　　「睡得好」重磅、分高，有幾大壓力，好在季初時段，加上向來A欄此程交得準，佢又係此廐季內首匹及少數會季前試大閘之馬，睇準備，搏得就搏。

　　「魔幻大師」夠快，12檔唔怕，加上應該冇馬同佢燒，形勢唔係冇。「創佳績」做好晒，對準今場一哩，用埋好手及排檔好，可信。「魅力星」大閘名次後但有餘勢，而近期工夫仍積極，不似求開氣。

第8場　第二班（100-80分） 1200米

　　「六六精英」及「大進」，一對路程專家，位好又夠工夫，只係評分已感壓力。「一定爆」12檔，早段埋唔埋到欄，自然係關鍵。「清風送爽」又係路程太準，大閘後上亦輕鬆，可威脅。「夢仙」劣檔、「旅英駿駒」分盡，只宜拖腳。「高風格」工夫太少，未必跑得番應有水準。

馬會賽馬節目主持　洪禮賢