凱沙冇牙吼緬恩斯加細

猪拉多纳

17/09/2011
文： Wendy

呢排股市狂跌，我小Wen子嘅損失計計埋埋可以買幾個名牌手袋喇！嗚嗚……前幾日已經放晒手頭上嘅貨，準備喺個市再低啲時先再出手。浮沉股海，我算係隻任性嘅小羔羊；但個市下瀉時，起碼我肯狠心離場，不致輸光輸淨。但係買波就唔同喇，一時心雄買大咗，中就威啫，一旦唔好彩開對家就血本無歸喇！




今晚做直播我要留守球彩台做德甲，尾場凱沙羅頓主場對緬恩斯點度都大注唔落。兩隊開季都唔對辦，加上呢場波分分鐘冇波入，就「雞仔注」買入球細同平手盤要緬恩斯！




（有線61及201台周日凌晨零時30分直播）


凱沙前線失血過多


凱沙羅頓嘅攻力好削，依家五場聯賽只入兩球，上季神射手拿傑在陣時，攻起嚟都算有些少睇頭，今季佢轉咗去禾夫斯堡，成隊即刻啞晒火，睇佢哋踢波就扯火喇！轉會窗臨閂前仲將有啲睇頭嘅伊利斯域賣畀漢堡，剩番嘅人腳名單，真係睇到都驚。今季主場未開齋不止，仲連對升班馬奧格斯堡都贏唔到！




緬恩斯整體實力高過凱沙羅頓，但今季仲未上力，最令我失望就係主場對史浩克04，領先兩球下竟然反輸二比四！好彩凱沙唔會有咁勁嘅反擊力啫！今場緬恩斯人腳幾齊整，預計會贏一比○或二比○。


有線球彩台主持Wendy


熱愛舞蹈的Wendy，04年歐國盃Euro Babe變身成為有線球彩台節目主持，當初對足球猶如混沌初開，依家已滾瓜爛熟，最愛暢談波經。

phone波熱線：1831 678

電郵：soccer64@cabletv.com.hk

開放時間：「超級星期六」晚上9:00至深夜2:30