意甲帝國保衞戰 國米齊心圍攻羅馬

猪拉多纳

17/09/2011
文： 鄭少偉

「同是天涯淪落人」，呢句說話對國際米蘭同羅馬嚟講，都真係應景喇！呢兩大意甲「帝國」今季齊齊中衰，今晚佢哋正面交鋒，對兩軍統帥加斯柏連尼同安歷基嚟講係生死戰，邊個可以甩難？邊隊可以勝出，行出復興帝國第一步？「亨利」就睇好有班兵力撐嘅加斯柏連尼，可以領軍打勝仗，國米1.72倍主W點都要追多一次！（開賽時間：周日凌晨2:45）




連埋意大利超級盃，國米開季踢咗3場輸晒，睇番佢哋喺意甲首輪作客巴勒莫，兩度領先，兩度被追和甚至反輸嘅「死因」，查實係加斯柏連尼排出咗森美爾、盧斯奧同辛尼迪呢條過百歲嘅3人防線，但睇番場波，國米作客都入到2球，證明鋒力唔曳，只係3後衞陣式係好具侵略性，可惜畀到對手太多空位進攻啫。


辛尼迪叫隊友搏命保帥


好彩，之後加斯柏連尼喺周中歐聯對特拉布宗，已經知衰用番4後衞，雖然最終輸波，但起碼住對手嚟攻，落敗只係唔夠運。今日國米再喺地頭出擊，有科蘭、史奈達、迪亞高米列圖等大將衝鋒陷陣，唔愁冇波入。最緊要係國米大佬辛尼迪，尋日帶埋老婆出席旗下Pupi基金會創辦10周年慶典嗰陣受訪，除咗話冇後悔多年前拒投皇馬嘅決定，仲開腔叫班隊友齊心踢好波，以行動力撐加斯柏連尼，勁有義氣！


安歷基硬套433累死雌狼


對家羅馬季前大事增兵，又喺巴塞B隊請嚟教頭安歷基揸弗，一心諗住為呢個等待復興嘅帝國帶嚟新衝擊，點知「安生」未坐暖個帥位，就先喺歐霸盃出局，再喺意甲首輪主場輸畀卡利亞里，令人勁失望！最大鑊係安歷基將巴塞嘅433陣式夾硬套落羅馬班兵度，擺明係格格不入，新兵舊將唔清楚自己嘅崗位，又點會打勝仗先？以佢哋咁嘅狀態出征聖西路，對住矢志復興嘅加斯柏連尼大軍，仲唔係九死一生咩！


國米主場對賽佔優


‧計埋意超盃，開季3場正式比賽都輸晒。




‧近6次於主場迎戰羅馬不敗，共3勝3和。

羅馬近3戰不勝

‧連續3場正式比賽不勝，錄得2負1和。

‧近3戰半場都能保持不失，但只得1場入到波。