布力般爆廠「大」無畏

猪拉多纳

17/09/2011
文： 郭球奇

大換血後嘅阿仙奴，近況睇落好似有好轉，查實防守仲係錯漏百出，今晚喺英超作客布力般流浪，絕對有暗湧，畢竟對手班主出到聲叫球迷撐領隊堅恩，一班球員肯定加多兩錢肉緊，考慮兩隊近年對賽多大手交易，球奇覺得呢場捧1.85倍入球大比較穩陣！（有線200及300、廣東體育周六晚7:45直播）




為走出慘敗畀曼聯2:8嘅陰霾，阿仙奴早排喺轉會窗關閉前狂掃貨，結果之後成績的確有改善，先符碌擊敗史雲斯打開英超勝利之門，繼而喺歐聯首場分組賽大部分時間領先下，臨完場先畀多蒙特逼和，好多人都戥兵工廠唔抵，但如果你有睇嗰場波，應該覺得阿仙奴唔輸先好彩，皆因後防錯漏百出，特別係梅迪薩卡，明顯未融入球隊，多次包越位，絕對係一個計時炸彈。




不過球奇對阿仙奴嘅火力始終放心，畢竟兵工廠今場有領隊雲格歐聯停賽後復出指揮，翼鋒謝雲奴同中場桑治亦停賽期滿，加上大勇射手尹佩斯同快翼禾確特，就算中場路斯基同艾朗藍斯因傷好大機會缺陣，影響都唔算太大。


1000擁躉抗議要炒領隊


布力般流浪今季喺英超出閘脫腳，4戰只得1和3負，搞到球迷勁嬲，據報近日已成功召集到1,000人，準備喺今晚對阿仙奴前進行遊行抗議，要求球隊炒咗領隊堅恩，搵番曉士執教。




不過，布力般會方立即發表聲明，呼籲擁躉繼續支持堅恩，一齊闖過難關，當中上場對富咸取得英超首個入波嘅前鋒魯賓洛堅拿，就立即走出嚟表態支持領隊，仲話有信心今晚可以擊敗阿仙奴。不過睇番近績，布力般後防實在超曳，連埋英聯盃，開季打5場正式比賽場場都有失波，再睇埋兩隊近6次交手，一共有5次開出入球大，睇嚟今場再開機會唔細！


橫數千軍


 布力般鬥廠仔輸多贏少

‧近6次交手獲1勝1和4負，5次開大。

‧近8場3勝1和4負，5次開大。

 阿仙奴難保清白身

‧近8場3勝2和3負，對上5場只得1場保持清白。

‧前鋒尹佩斯近4場入3球。

布力般近6次鬥阿仙奴5次開大 前者主場

日期 戰果

11/04/03 阿仙奴 0:0 布力般

10/08/28 布力般 1:2 阿仙奴

10/05/04 布力般 2:1 阿仙奴

日期 戰果

09/10/04 阿仙奴 6:2 布力般

09/03/14 阿仙奴 4:0 布力般

08/09/13 布力般 0:4 阿仙奴