馬主論戰

猪拉多纳

電訊超星有冷味

　　今日我哋「電訊」系有馬出，其中第五場隻「電訊超星」，上季初出響田草1200米跑近「勁信心」同「自由勝」上名，係一匹幾利跑新鮮嘅馬。

　　今次「電訊超星」季內初出轉攻1400米，用普萊西會有合理賠率，冷冷哋諗得過。

　　另外鍾意第七場「富高勝」，上季尾贏1400米姿態出色，依家跑呢個路程可能仲啱，開鑼日已經跑過一仗熱身開氣，今次匆出增程隨時會有唔同演出。

張敬山

東方駿馬演出準

　　剛啱苗禮德憑「咁都得」開齋，呢位練馬師上季訓練「雄心威龍」成為馬王，功力真係有番咁上下，今日不妨吼住佢手馬。鍾意頭場「雄心馬主」，呢隻馬響開鑼日已上陣，結果輸少少返嚟跑第二，今次匆匆再戰，唔使講一定係想贏番場，值得吼實。

另外推介第三場「東方駿馬」上季五戰取得兩冠兩亞一季，上名率達百分百，真係準到冇人有，今次跑番直路賽，路程有根有據，贏得。　

任達華

一路奇兵咪睇小

　　韋達剛戰憑「金獅駿將」同「南陽望族」起孖，似乎呢部贏馬機器已經撻着，今日捧佢場應該冇錯。推介第二場「一路奇兵」，前季試過響四班打叠贏三場，證明實力唔簡單，上季由於頻頻跑三班賽，冇表現可以理解。今次響四班出賽，而且唔使孭重磅，睇嚟係時候重開勝門。

　　另外鍾意第六場「大衛精神」雖然呢隻馬未贏過，但韋達依然響晨課一手摸實，信任佢嘅眼光，不妨小敲。

寇鴻萍、梁廷鏘