周瑜智鬥諸葛亮

猪拉多纳

18/09/2011
文： 黃興桂

今輪英超最矚目賽事非「曼車大戰」莫屬，老實講單睇兩位名帥賽前論戰，已經好睇過孔明鬥周瑜。費格遜功力深厚，老奸巨猾，向初到貴境嘅保亞斯大笠高帽，話佢有料又年輕，有力立足英超，其實只係賽前口術。




費Sir一心想用甜言蜜語，搞到對手飄飄然，在大戰中失手，不過保亞斯亦非善男信女，佢喺波圖已經贏咗唔少錦標，亦面對過好多有料教頭，係人係鬼都會分得一清二楚，唔會咁容易被費Sir口術所影響。


魔車戰球證醒定啲


講番場波，曼聯今季開咧順暢，接連大炒阿仙奴及熱刺等強隊，狀態好到不得了，最重要係一班年輕球員成功上位，菲爾鍾斯及湯卡華利等擔正都冇蝦碌，呢樣嘢比起成績更為重要，無疑被外界睇高一線。不過，車路士亦係有備而來，兩隊實力不相伯仲，係名副其實嘅五五波，Peter認為好大機會和波收場，但最重要係球證一定要執法理想，若然一個誤判或者錯失影響球賽，就真係令球迷好懊惱。




另方面，Peter都想藉機會同大家分析一下首輪歐聯。好多球迷見到曼市雙雄等強隊首輪失分，就指摘佢哋輕敵大意，但Peter可以同你講，強隊在歐聯分組賽中，根本就唔在乎全勝，最主要嘅目標只係出線之嘛，贏晒分組賽會有獎盃咩！所以歐聯分組賽亦都係一個考智力嘅賽事，若然你場場去盡贏波，但搞到班兵殘晒，呢個絕非明智之舉，反而保留實力下成功出線，先考工夫。




金句：奇謀妙計，賽前減壓歌頌敵人