馬體會靠德住

猪拉多纳

18/09/2011
文： 法比加輝

「馬德里雙雄」在香港時間周一凌晨分途出擊，馬德里體育會主場迎戰桑坦德（now 632及660周一凌晨零時直播），而皇家馬德里就作客利雲特（now 632及660周一凌晨2時直播）。加輝睇好馬體會今季可以重返前四，事關佢哋換血後有番朝氣，幾名南美新兵又啱踢西甲，而且放走晒有離心球員，球隊都團結啲啦！




除「西甲曼城」馬拉加外，今季變動最大嘅非馬體會莫屬。換帥、換門將，仲換埋一對前鋒，差唔多執咗半隊波咁滯。其實加輝認為換血並非壞事，首先本人一向唔太喜歡前教練科里斯，搵經驗老到嘅文沙奴頂替佢，確係明智之舉。至於兩位星級前鋒早已有離心，勉強留低亦冇幸福，尤其科蘭已經被科里斯雪到廢晒武功，如今換來炙手可熱嘅射手法卡奧，再加埋西班牙新星阿祖安盧比斯，似賺多過蝕！




不過最抵讚都係佢哋終於捨得買中場，馬體會近年最大問題就係缺乏領軍人物，上季仲要先後放走祖拉度、沙保沙同魯爾加西亞，搞到馬體會冇晒創造力，就算有幾強嘅前鋒都冇用啦！幸好今夏先後引入阿達杜蘭及迪亞高，前者已經極速融入球隊，而迪亞高亦開始走出陰霾，加輝相信以上幾位新兵，可領馬體會殺出血路。




馬體會上周中在歐霸盃輕取些路迪，法卡奧同迪亞高成功取得加盟後首個正式賽事入球，預期今輪會食住個勢強攻桑坦德，有主場之利下勝算高。再者桑坦德飽受傷兵困擾，梅里迪斯上陣成疑，而哥沙與托利莊就肯定缺陣，加上柏巴高尼迪奧普停賽，陣容如此不整，照計好大機會輸多過一球，一於捧馬體會「讓球主勝」。


皇馬或缺Ｃ朗博細


至於「大哥」皇家馬德里就有少許暗湧，皆因靈魂人物基斯坦奴朗拿度在上周中歐聯被踢傷見血，今場未必出得，難怪隊友卡維奴都出面呼籲球證，要保護C朗呢類球王級球員。若然C朗真係避戰，皇馬入球能力自然銳減，所以今場作客利雲特，加輝會揀入球中位數3.5球嘅細盤。

有赢不输