紅魔B隊餓襲列斯聯 貝BIG出關

猪拉多纳

20/09/2011
文： 樂比堅尼

香港時間周三凌晨上演多場英格蘭聯賽盃第三圈，於英超五仗錄得21個入球、氣勢如虹嘅曼聯將作客英冠球隊列斯聯。紅魔今仗肯定會收起部分主力，但後備席上仍有貝碧托夫、奧雲及傑斯等老波骨，佢哋亟需建立信心維持狀態，曼聯今季本土賽事全開大，嫌客W冇肉食，不妨再向大盤埋手。（now 638周三凌晨2時45分直播）


副選球員夠飢渴


列斯聯去年足總盃第三圈曾爆冷以一比○淘汰曼聯出局，仲令到當時入波嘅碧福特一炮而紅，好多人都話曼聯今次要大報復，但你估依家仲係武俠片時代咩，輸咗就要報仇咁咪好唔得閒，無可否認曼聯同列斯聯係有啲歷史恩怨同過節，但聯賽盃只係雞肋，預咗曼聯今仗會派大量副選上陣。




幸好，曼聯板櫈深度遠勝前幾季，班後備夠晒卡士，好似貝碧托夫、奧雲、傑斯、甚至朴智星及路爾斯華倫西亞今季長居後備，預計費爵爺會放佢哋落場，等佢哋可保持狀態，呢班高質後備餓波咁耐，隨時搵列斯聯祭旗！


列斯聯主場「大」駁火


列斯聯喺英冠嚟講，可謂比上不足比下有餘，上季僅排第七未能搭上升班附加賽尾班車，今季實力亦未見改善，班主卑斯作風守舊人緣麻麻，好多球迷要求佢落台，其實列斯聯入球能力不俗，好似前線有射手羅斯麥哥馬克、安迪基奧治等好手，後備席上亦有科素、比治奧呢啲大家熟悉嘅球員，唔使擔心入唔到波，樂比仔相信列斯聯有能力喺曼聯身上取得入球，呢場捧大就啱數。