洪禮賢講馬：閃耀小子卡加精神開心好多砵砵車

猪拉多纳

　　今晚谷草賽事採用B欄，排檔固然重要，跑法主動與否，其實仲緊要，正常情況下，直路唔容易追，相信季初時分，此現象會更為明顯。冇韋達喺度，柏寶受注目程度將大增，有冇好帶挈屬後話，純粹講今期坐騎實力，隔晚匹匹有飛之餘，賽前秤機會，好幾匹至少有三甲。

重心場次　第3場　第一班（105-80分）1650米

　　「俊鬥仕」草閘試得好，埋門試跑亦對辦，準備夠，進度理想，唔擔心初出表現唔到應有水準。由於今場馬少，但多馬會走，佢中置跑法，安心守好位，形勢與勝時差唔多，有機會W。

　　「家樂飛」轉場賺級數，不過評分漸到頂。「金堡龍華」初出之前大閘一步都冇，落場跑卻兩回事，寄望開氣後更紮實。「智友」重戴眼罩係好，問題係試閘表現未盡滿意，爭腳。「快人快語」早段如夠快，末段會係佢世界。

　　「迎風起舞」耐冇跑，唔知有冇疏懶手腳，不過做夠兩閘，備戰充裕。「喜跑得」初出頭兩段放得唔快，直路亦腳軟，唯一期望係短直路易捱啲。

第1場　第五班（40-15分） 1650米

　　「過關勇將」9月贏谷閘時由頭帶到尾（有戴眼罩），今次重戴兼11檔，預計會走先，效果或會好。「燈胆寶」5季初出均冇P，數據「靚」，但計班，根本好超。

　　「康莊大道」成日因為慢閘及臨場情緒影響表現（早前試泥閘一樣係慢，不過追得好），不過，落班形勢唔同晒，希望早段唔好大讓賽，直路追得切。「龍船快」上季已講過係中距離馬，上賽田草1200米都揀，冇理由加程唔跟多場。

第2場　第四班（60-40分）1650米

　　「重量級」比上季初低咗接近30分，減分應較退化速度快，4檔形勢安全，而之前大閘留後追有反應，印象唔錯。「金玉之光」上場蝕位多，返到直路依然幾貫注，如果谷草啱，2檔及直路短或更好發揮。

　　「童夢」及「精算拍檔」，俱排外檔焗搶，可能兩敗俱傷。「野馬」去季初出之前冇大閘，今季則試夠兩個，態度唔同，今場唔會係只求熱身。「喜寶寶」大閘騎到甩髀，追勢唔算強，但又係經歷上季大幅減分，隔了1個暑期，或有唔同。

第4場　第三班（80-60分） 1000米

　　「按一按」曾與「皇帝法令」串Q，轉場賺到對手實力跌幅，而主動型馬排9檔，未必克服唔到。「常山鳳寶」路程專家排6檔，唔難早段泊好位，形勢應不差，加上分數回落，有資格爭。「海之宏」此程冇1200米咁好，但B欄1檔上名率太高（近季有45%），拖一注。「開心至愛」及「閃耀之星」，試跑觀感，以後駒較理想。

第5場　第四班（60-40分） 1650米

　　「金鑛龍華」上場或受意外影響，總之，暑後比前大隻而情緒有好轉，應有進步，有冇高估佢，睇埋今場。「大東海」前季第2仗出賽入Q，上季一出即勝，唔排除狀態係易嚟易去，如果睇賽前準備，馬房唔係冇配合。

　　「雪山神駒」初出臨尾衝落唔多，或可歸咎季前工夫冇壓迫，開氣後有機會大幅提升。「開心」唔係冇晒mood的話，以準備及進度嚟講，又降埋班，唔難上名。

第6場　第四班（60-40分）1200米

　　「閃耀小子」上季同程能壓倒一堆識贏對手，有實力依據，而由於只比勝時多5分，更冇顧慮；初出揀短途及重戴眼罩，總好過跑1400米，睇賽前程序及配搭，應會搏。「卡加精神」上季及今季嘅暑後準備並唔一樣，所以，呢場未必係只為開氣。

　　「砵砵車」衰在出閘冇次好（外地及在港），就算最近大閘亦冇改善到，之不過，大閘試到中後段，走勢從容而後勁理想。「開心好多」初出在早段揨住，點會唔輸，當是檔位影響算吧啦！熱身後轉回谷草又排到2檔，仿如地獄變天堂。

第7場　第三班（80-60分） 1650米

　　「心中有程」及「漸信良駒」，1匹或會賺形勢，另1匹準到暈，加上排檔又好，正路之選。

　　「火熱動感」谷閘自動自覺輕鬆竄上，進度因工夫多，起得好好，唔係12檔，必屬首選。「國中之星」前季初出喺同程幾乎贏，證明休出一哩都得，而季前試閘沿路跟得順，尾段亦維持到，希望落場跑，交到相同表現。「蓋世子牙」初出前嘅準備，明顯比上季同期認真，小心。

第8場　第三班（80-60分）1200米

　　「三和之星」及「日月暉華」，跑法好蝕，不過，以近況而言，在今場係前幾名。「歐洲動力」同樣好狀態，不過，重磅及劣檔，怕有影響。

　　「威威多星」和「滙名燈」，一對方廐馬，比較喜歡後駒，因賽前做得嘢，絕對係好現象。「帝豪名駒」從來唔易睇，計分則比贏馬時低7分，邊線分子。「多多昇」及「團隊精神」，班次受壓，爭腳居多。

馬會賽馬節目主持　洪禮賢