烏甸狀態好當紅黑兵冇到

猪拉多纳

21/09/2011
文： 力奇

開季3戰全勝嘅烏甸尼斯，今晚喺意甲快車作客衞冕冠軍AC米蘭，恃住上佳士氣，而且由迪拿達利同加比爾托治組成嘅鋒線組合有料到，絕對有本事保持不敗！特別係AC首席球星伊巴謙莫域養傷，要靠同主帥阿里基不和嘅卡斯辛奴支撐大局，又點會有好成績？今場AC讓波，我捧2.25倍「讓球客勝」。（now633台及中央5台周四凌晨2:45直播）




冇咗個橙，執番個桔都好，烏甸今夏走咗上季光芒四射嘅阿歷斯山齊士，人人以為佢哋等死，不過暑假用咗成700萬歐元買返嚟嘅「羅馬尼亞美斯」加比爾托治，喺意甲同歐霸盃3戰都有好表現，仲交出1個靚助攻添，老牌射手迪拿達利同佢勁合拍，難怪連埋歐霸盃，近3仗烏甸夾埋入6球啦！最緊要係除咗鋒線超勁，條後防線仲鬼咁穩陣，意甲2戰零失球，狀態咁好，受讓當然要捧場啦！


伊巴謙未好番晒AC內訌


對家AC就慘咯，賽前話瑞典射手伊巴謙莫域要做埋最後體測，或者可以勉強復出，不過講真，王牌有事，唔通真係畀佢夾硬踢咩？睇怕呢招都係戰績低沉谷士氣嘅伎倆，好，就當伊巴謙可以勉強上陣，但有傷在身，又幫到幾多吖？上仗皇馬踢到冇影嘅C朗，咪有辦你睇囉！




伊巴謙打柴，靠表現飄忽嘅柏圖，始終窄窄哋，反而卡斯辛奴狀態就幾好，今季AC嘅3個聯賽入波都同佢有關，可惜「壞孩子」近排同主帥阿里基嘈交，落到場唔係一條心，都係唔似靠得住，「紅黑兵團」想打開勝利之門，恐怕未係時候！