洪禮賢講馬:理性面對熱門死火

猪拉多纳

　　記得當年與本行前輩黃天霸先生，久不久會聚聚（經常佢請客，十次有九次係食上海菜），呢位叔叔一把年紀，但待人既不老氣、冇恃住係老行尊擺款、理論經常獨到、對話時用詞唔老土。如用流行術語的話，偶爾佢個樣及講嘢時都幾chok！而佢成日話：「騎師贏馬時，梗係漂亮！唔通輸嘅時候係英雄咩？！」呢點筆者絕對認同。

　　世事唔只得對與錯，還有一大片灰色地帶。惟賽馬世界，正如霸叔話齋，某程度上係得贏同輸。可會理性面對當中任何事態？未必人人可以，就算可以，亦未必場場賽事可以！打個比喻，1匹大熱門輸咗，大家嘅第一念，通常係怪責騎嗰個，好少會即刻聯想到：「咦，係咪隻馬水皮？或者狀態唔夠呀？」就係咁，騎嗰個，有時啲死貓會「質」到成口都係。

　　葉廐見習騎師吳嘉晉，近期熱門輸完1匹接1匹，佢今季有12匹坐騎被捧成大熱或次熱門，入到圍得４匹（1冠3亞），咁究竟係咪佢要負全責？好似「俊鬥仕」及「漸信良駒」，兩駒出閘都唔夠靈敏、早段形勢唔就，根本唔到騎嗰個控制。另外，「金玉之光」途中勒避過、被對手踢中後曾經唔展步、賽後有傷口等等，亦唔係吳嘉晉所能避免。上述一堆熱門馬成績唔好，真係唔覺關佢咩事。