格蘭納達古城風味 意資助長

猪拉多纳

25/09/2011


近年有唔少球隊都因為獲得大財團注資而崛起，當中包括今季升班馬CF格蘭納達。呢支小球隊自○九年同意甲球隊烏甸尼斯合作成為對方衞星球會之後，就獲得烏甸借用大量新星而實力大增，因而被稱為「山寨版烏甸尼斯」。

CF格蘭納達來自西班牙安達盧西亞自治區內嘅格拉納達省，格拉納達市徽中有一個石榴，因為西班牙語中，石榴就叫做「格拉納達」。市內最著名嘅地方係摩爾人王宮阿爾罕布拉宮，呢座融會了穆斯林、猶太教及基督教風格嘅著名歷史古蹟，使格拉納達市成為西班牙一個文化和旅遊熱點。

其實CF格蘭納達近年都算行運，早幾年先獲前皇家馬德里會長辛斯入主，到○九年財困又獲烏甸尼斯資助避過散班一劫！之後烏甸仲好到借出大量潛質優厚嘅新星畀CF格蘭納達，結果助後者僅用兩年時間，就由西丙閃電重返西甲，相隔三十五年後再度征戰西班牙頂級聯賽。


山寨版烏甸尼斯


烏甸今季繼續借出多名良將畀CF格蘭納達，當中包括上季在西乙射入廿四球嘅前鋒殺手基祖，以及恩哈路及謝美羅美路等。不過西甲水準同西乙差天共地，所以CF格蘭納達升班後開季成績只屬一般，仍被視為降班大熱。