帕爾馬殺破狼！

猪拉多纳

25/09/2011
文： 走肖

巴塞隆拿同羅馬，始終完全唔同風格，安歷基上任後將「雌狼」羅馬改造成「Barceroma」，注定失敗，帕爾馬今晚喺意甲主場對羅馬，受讓平半值得冷敲。講到底安歷基搞唔掂班大帝，冇球員支持邊有好成績？加上佢唔知衰再插球員冇自信，呢隻「破狼」想開W都幾難。（now633台周一凌晨2:45直播）


羅馬死踢433球員唔撐


成功教練，唔一定要全隊當佢神咁拜，但至少要好似費格遜、哥迪奧拿同莫連奴，有個人魅力可以令球員為佢賣命。羅馬新教練安歷基？Sorry，佢未坐暖張櫈就打鑼大換血，夾硬將羅馬陣式改為巴塞嘅433，又試過對卡利亞里用6個新球員打正選，同埋逼柏路達打右閘，至於要托迪做後備，就更加係死罪。

如果以人腳計，羅馬今場要贏絕對唔難，問題係睇個勢，安歷基已徹底被孤立，冇人肯幫佢解圍，新老闆賓尼迪圖落柯打炒人前，真係唔覺羅馬有咩動力反彈。最慘係日前羅馬臨天光失波被錫耶納逼和後，安歷基又發作鬧球員冇自信，感覺上縮骨又卸膊，咁搞法唔變孤獨精就奇，開季5場得3和2負咪亂捧。


基斯普+基奧雲高有料到


除咗冇人聽安歷基支笛，門將史基倫堡養傷都係羅馬隱憂，即使前鋒奧斯華度日前提早傷愈兼入波，都係信唔過。對家帕爾馬近12次對賽得3和9負，幾乎被恰死，不過36歲嘅射手基斯普，上季聯賽都入到9球，而且頭2場聯賽入3球嘅基奧雲高，停賽1場後可以復出，「基基組合」足夠破宿命搶分。


橫數千軍


 帕爾馬連開4場大
‧連續4場開入球大。

‧開季後4戰全部開入球單。

 羅馬近戰多失波

‧對上5場得1次保持清白。

‧開季5場未試過落後。