諾域治贏活力博冧莊

猪拉多纳

26/09/2011
文： 朱楓

好多打工仔放完周末後，禮拜一返工都會無厘精神，情況就好似新特蘭咁，患上「星期一腳軟症」，今晚喺英超作客諾域治睇怕都係九死一生，畢竟諾域治近期重新起用荷拉漢後中場活力大增，呢場朱楓撐硬「金絲雀」上盤！（有線200及300、廣東體育周二凌晨3:00直播）


金絲雀荷拉漢好波信心強


由於開季4場聯賽不勝，諾域治上周作客保頓大膽作出6個變動，結果收到奇效贏2:1，唔止攞到今季英超首場勝利，仲取得相隔17年後首次英超作客贏波，賽後中場大衞霍斯話呢場勝仗大大減輕球員壓力，同時增強信心，相信嚟緊會愈踢愈好。




雖然上場大變陣成功，但領隊林拔日前接受訪問就暗示今晚可能會出番格蘭荷特等主力，理由係因應對手嘅踢法作出針對性部署，同時希望畀班球員知道，隊中每個球員上陣機會都係均等，間接增強球員鬥心。佢亦大讚中場荷拉漢好得人驚，擁有隻手改變賽果嘅力量。事實上，「金絲雀」近期重新起用呢位上季升班功臣後，中場即時活力大增，中堅韋伯特繼續缺陣濕濕碎啦！


黑貓近13次周一出賽不勝


同諾域治一樣，新特蘭上周主場大勝史篤城4:0，取得今季首場英超勝利，可惜今晚想冧莊唔易，事關翻查歷史，原來「黑貓」近13次喺當地時間禮拜一踢英超都未贏過，邪到你唔信，而且後衞巴士利仲要繼續停賽，前鋒域咸又暗示不滿上陣時間，考慮離隊，總之就怨言多多，一句講晒，新特蘭唔似破到宿命囉！