棟悉先機：競駿寶寶打鐵趁熱

猪拉多纳

　　跑咗幾期賽事，成日聽到身邊手足話：「啲馬難賭、成日爆、唔識捉。」阿棟其實有感，不過，由於我向來揸住宗旨做人，每期唔會賭過龍，亦只係挑一兩場出嚟玩，所以，好多場合爆得甘，唔多關我事。當然，如果馬場仲係咁吹冷風，對邊個都唔好，希望賽果「熱氣」多啲，馬迷朋友唔使個個口糠糠。

　　第四場四班1650米。「心路」上季第二回合勝出，亦係跑谷草一哩，會唔會重溫舊夢，成數幾高，事關上場初出跑此程，已經追得似模似樣，只係差一步就有Q咋。方仔啲馬，短時間內肯再出，斷唔會「流料」，就好似剛勝嘅「滙名燈」，所以，呢匹馬隔1周再跑，或意味着想快啲補中。

　　第六場三班1200米。「競駿寶寶」去季成績唔係好標青，無他嘅，隻腳有傷患，又曾經跑到有痰，仲維持唔到正常出賽頻率，冇瓣完整又點會有大幅進步。不過，今季情況就唔同，初出路短兼冇形勢，拉士一樣如飛殺上，而可以喺短期內再出，更加係好現象。此外，跑長200米會更合性能，呢系馬鬥志好，一於捧佢場。

　　第七場三班1650米。「勝任有餘」嘅倉口仍未開齋，係有啲意外，但馬房兵源多，阿航功力亦深厚，首W係遲早嘅事而已。講番隻馬本身，上場賽事形勢唔就，拉士依然喼到後勁，難得衝到尾至冇P，成績出色。呢次阿滇停賽轉用韋達，咁啱抽埋1檔，兩樣轉變都係好事，雖然我一向唔主張追馬房開齋，但呢匹熱門馬幾可信。

點買法

　　第六、七場一對熱門馬「競駿寶寶」和「勝任有餘」，初出已跑得好，再出博W合理。重心QT場次則揀要第六場，１１做馬膽，腳拖幾匹新嘢，好似２、６、７、９。

資深評馬人　陳華棟