失寵林伯加操爭正選 施治怕累街坊唔掂即退

猪拉多纳

28/09/2011


車仔「鐵人」林柏特最近被領隊保亞斯打入冷宮，連英格蘭國家隊「大哥大」都要做後備，不過佢強調自己未玩完，上星期仲專登加操希望做番正選。另一方面，車仔門將施治5年前撞親個頭，到依家都有陰影要戴頭套比賽，佢話假如有一日覺得自己唔掂，就會退役費事累街坊。


施治：唔敢出迎就退役


以往林柏特係車路士必然正選，但近4場佢3次做後備，日前對史雲斯嘅聯賽，保亞斯寧願派新仔麥伊治蘭入替都唔揀林伯，所以外界認為，33歲嘅佢應該疊埋心水轉會，但知情人士話，林伯堅持履行餘下兩年合約：「佢選擇更加努力去操練，證明其他人睇錯，而且佢對車路士好有感情，冇打算離開。」




至於對富咸傷出嘅施治，就自爆有可能提早收山：「半場返休息室，我坐低後起唔到身，視線模糊兼失去意識，所以我要求即刻去醫院做檢查。其實對史雲斯嘅比賽，我都係開波前覺得冇事至決定落場，如果將來我因為怕撞親個頭唔敢出迎，我會退役，因為你冇足夠準備嘅話，就會連累隊友。」